2017年1月12日 星期四

新界人點返工


1. 今日大埔谷街坊的熱話題目是大埔人過海返工的煩腦。呢個問題真係唔講得笑,朝早繁忙時由大埔過海真係唔知點算。搭巴士?吐露港唔塞,去到沙田都會塞;觀塘繞道唔塞,上到東廊都一定塞。除非你提早兩個鐘出門口,否則一定遲。搭港鐵?一早起身罰企迫足一粒鐘最少轉兩次線,難捱。好好彩,之前我在中大返工,每日搭車只要八分鐘,由大學站去到office門口的時間仲耐。

2. 受這個討論啟發,我決定查一查有幾多大埔人是一樣咁慘的。原來大埔三十萬人口,有兩萬人是在港島上班的。這些人多數選擇火車轉地鐵,搭巴士的較少。似乎大家都是寧願企和迫,都不想遲到。

3. 其他新界朋友又如何呢?翻查新界九區去港島和出九龍返工的數據,總的來說是搭港鐵為主,但有明顯的地區差異。例如西貢去港島,大多數是港鐵,相信是指將軍澳綫的沿綫居民。事實上,將軍澳綫通車後巴士路線大減,想搭巴士都冇得搭。相反,屯門人無論去港島和出九龍,都是選擇巴士多於港鐵,理由按朱廸的解釋,應該係西鐵好鬼貴。

4. 屯門人的另一特點,是搭邨巴。雖然邨巴在各區的客量都不算多,但在屯門卻是最明顯的,其次為元朗。邨巴提供點對點服務,是偉大的發明。但為什麼新界西做得起新界東卻不行呢?我懷疑這就是西隧和東隧的分別。如果東隧不塞車的話,邨巴在新界東是大有可為的。

5. 然後是小巴。我發現小巴在三種上班路線是最受歡迎的:葵青出九龍,荃灣出九龍和西貢出九龍。這三個地方都是小巴重地,結果十分合理。

6. 其他一項出現得最多的是離島人去港島,這應該是指搭船,不是游水。

7. 最後,我想向由沙田自己揸車出九龍的朋友作出強烈呼籲:唔該搭返公共交通工具,或使用隨意門。我地大埔北區人出市區已經好辛苦,唔該唔好阻住條路。多謝合作。

*加多句:唔止沙田人,大埔人都一樣,總之有得揀就盡量唔好揸車啦。朝早條路有幾多私家車,大家有眼見的,多些人用公共交通當然會更好。或者你會問:唔想塞車你早些少起身咪得囉⋯⋯我只好答你,大家咁話啦。

**再加多句:咁我都知講長遠係要起多條鐵路先得。沙中線起緊啦。咁點解通車日期一拖再拖呢⋯⋯問政府啦。


September 22, 2016

沒有留言:

張貼留言