馬會 35 億做乜好？

1. 即係咁，我買六合彩，除咗發幾個鐘橫財夢，都會借啲咦話做善事姐。咁我樓下間診所，又真係馬會科水起嘛。點知今日新聞同我講，馬會要俾 35 億響西九起個故宮分館出來，我心諗，原來「做善事」呢三個字真係可以無限延伸。

2. 馬會如果用 35 億起返啲我地平時理解馬會起嘅嘢，可以起啲乜？咁橋政府最近問緊立法會攞錢，要響將軍澳起一座社區服務大樓，入面包括社區中心＋家庭服務中心＋特殊幼兒中心＋早期教育中心＋長者鄰舍中心＋青少年外展辦事處，樣樣都係社會所需 (立法會文件 PWSC(2016-17)40 )。呢座大樓造價要兩億幾，即係 35 億可以起 15 座。諗返有幾多家庭、幼兒、長者同青少年需要社區服務，喂，我覺得做事真係要分一分先後輕重。

3. 咁我都好肯定，有人會話故宮係特色嘢，唔可以用平時社區嘢來比較。第一，我真係覺得社區嘢好緊要。第二，如果真係要與別不同，就要以香港的特長為依歸。有乜嘢博物館係香港先起到？六四紀念館、文革紀念館、大饑荒紀念館⋯⋯真係要用盡香港作為邊緣的角色，唔該起呢啲。

4. 當然，呢件事，你同我都冇得say no。馬會唔係立法會，拉布都冇得你拉。正正係咁，呢件事先會由馬會出錢，唔係問立法會。但問題係，最初起西九，係無預到要起座故宮博物館響度。咁大改變，點解唔俾民意代表監督，反而刻意繞過民意代表呢？與此同時，如果馬會可以以做善事為名，支持一個政治上咁有爭議的項目，此例一開，之後馬會錢仲可以用來做乜呢？

5. 有研究開香港社會同歷史的學者，相信對馬會本身都冇乜好感。我冇馬會會籍，唔會約人去馬會食飯傾計（得明白馬會是個冇公共交通到的地方，好難去，離開中大的其中一個開心位係唔洗再去馬會食飯）。只不過，如果可以的話，我都想馬會可以做多少少真正的好事。之前工作關係，都認識少少馬會相關的人和工作。呢單嘢，相信都係上面壓落嚟，冇得唔做。但借呢個機會，大家都係時候要關心一下馬會的管治。

6. 至於西九塊地，本來係屬於全港市民的。乜嘢諮詢都冇，推翻晒之前的規劃，無端端多樣嘢。呢種事，九七後發生得太多。起故宮博物館唔係問題，但個決定過程完全黑廂，香港市民唔信政府你又可以怪邊個呢。

December 23, 2016