一帶一路民主交流團

1. 前特首梁振英今日出席2017博鰲青年論壇(香港)的時候，建議每所本地學校可挑選十位學生參加一帶一路體驗團，費用由相關基金會負責，讓青年身體力行，體驗各地文化。我個人就好支持年輕人志在四方，即刻建議下列一帶一路國家供各位參考。

2. 很多一帶一路國家都經歷過從專制獨裁走向民主的過程，特別是八十年代尾九十年代初的一波民主浪潮，當中為什麼有些國家的民主化成功穩固，有些地方卻倒退回獨裁，就好值得借鏡。例如波蘭的民主化故事，可以帶同學去位於格但斯克的歐洲團結中心，現場見證當年波蘭團結工會如何推動民主，諗諗香港的公民社會要點樣發展。同學又可以去捷克布拉格的正版連儂牆，睇睇同港版有乜分別。

3. 來到東歐，就點都唔可以錯過一系列由前蘇聯獨立出來的國家。例如波羅的海三國，獨立後都相對穩定，經濟發展良好，愛沙尼亞更成為新興科技國家，說不定同學可以真係見到下一個 Steve Jobs 。要同學正確認識獨立運動，可以去拉脫維亞里加同埋立陶宛維爾紐斯的 KGB 博物館，見證政治打壓同埋轉型正義。

4. 講到從前蘇聯獨立出來的國家，大家都知道我很強調獨立不是終點，政治博奕是活在強國邊緣不能避免的課題，唔係話你唔理佢就唔存在。對於呢一點，烏克蘭、格魯吉亞，仲有摩爾多瓦的人民，應該感受至深。我建議同學可以去一去烏克蘭基輔的市中心廣場，問一問當地人他們的廣場革命是什麼一回事。

5. 嗱，其實唔洗等，公民教育委員會現在已經有「一帶一路交流資助」，去上述國家的話每名學生每日可以有港幣1000元至1360元資助，好多中學都申請過。我現在承諾，如有任何院校希望就上述主題舉辦「一帶一路民主交流團」，我可以免費提供行程策劃顧問服務，因為我真係好想知道政府會唔會批。

6. 講開前蘇聯，最後順手推介一下，我本書。